ՀԵՔԻԱԹ ԵՐԵՔ ԹԶՈՒԿՆԵՐԻ, ԹՓԹՓԻԿԻ ՈՒ ԱՐՋԻ ՄԱՍԻՆ
Կար հեքիաթային մի լճակ:
Քաղցրահամ էր ջուրն ու մինչև հատակը աչքի տեսանելի: Ափերի ավազը մանր - մանր էր, ասես ծովափի ավազ լիներ: Լճակի կողքին փռվել էր հրաշք մի անտառ` բարձր, շատ բարձր ծառերով: Որքան էլ արևը քիթը խոթեր անտառի խորքը, մեկ է, չէր կարողանում ամեն ինչ տեսնել` անտառը խիտ էր ու գաղտնի տեղեր շատ ուներ:
Կային լճակը, անտառը, արևը: Կար մի տնակ` անտառից քիչ հեռու, լճակից քիչ հեռու, որտեղ կարող էին ապրել մեծերն ու փոքրերը: Հենց այդ տնակում էին ապրում չորս ընկերները` Թփթփիկը և երեք թզուկները: Թփթփիկը թզուկներից շատ մեծ էր, իսկ թզուկները փոքրիկ երեխաների նման էին: Բայց որքա՜ն խելացի էին թզուկները, շա՜տ խելացի էին, ճիշտ և ճիշտ խելացի երեխաների՛ պես:
Եվ քանի որ բոլորն իրար լավ էին հասկանում, այդ պատճառով էլ ապրում էին հաշտ ու համերաշխ: Միասին գնում էին անտառ, հատապտուղներ հավաքում, մրգեր հավաքում, լճակից ձուկ բռնում: Ամեն արած գործ այնքան հետաքրքիր ու հաճելի էր ստացվում,
որ հոգնել չկար:
Մի անգամ, թզուկներից մեկը տանձը զամբյուղի մեջ գցելու փոխարեն, գցեց Թփթփիկի գլխին: Դա Կապույտիկ անունով թզուկն էր: Կապույտիկը շփոթվեց պատահածից, իսկ Թփթփիկը չնեղացավ, որովհետև գիտեր, որ Կապույտիկը
դիտմամբ չարեց: Կապույտիկի շփոթմունքի վրա` Թփթփիկը, Կարմրիկի ու Կանաչիկի հետ միասին, սկսեցին ծիծաղել:
Թզուկների հագուստները իրենց անունների նման էին.Կանաչիկն ուներ կանաչ գույնի գլխարկ, կանաչ կոշիկներ, մեջքին կապած կանաչ գոտի: Կարմրիկն ուներ կարմիր գույնի գլխարկ, կարմիր կոշիկներ, մեջքին կապած կարմիր գոտի: Կապույտիկն ուներ կապույտ գույնի գլխարկ, կապույտ կոշիկներ, մեջքին էլ պինդ կապած կապույտ գոտի: Անտառից հավաքած բերք ու բարիքով ծանրաբեռնված թզուկներն ու Թփթփիկը ուրախ - ուրախ ճամփա էին ընկնում դեպի տուն: Կարմրիկը նստում էր Թփթփիկի գլխին` նրա ցանցավոր գլխարկի վրա, Կապույտիկը նստում էր Թփթփիկի մեջքի լիքը զամբյուղի վրա, իսկ Կանաչիկը նստում էր նրա ուսին: Ողջ ճանապարհին նրանք ուրախ երգում էին.
-Ընկերնե՛ր ենք մենք անվախ,
Ապրո՛ւմ ենք հաշտ ու խաղաղ,
Միասին մի հարկի տակ
Ազնիվ, բարի ու շիտակ:
Թզուկներ թե՛ Թփթփիկ,
Եղբայրնե՛ր ենք մնալու,
Մե՛ծ ենք ծնվել, թե՛ փոքրիկ,
Հավասար ենք սիրելու:
Ես ավելի շա՜տ
եմ սիրելու ընկերներիս, նրանց սիրո՛ւն հավասար ու մի կաթի՜լ ավելին` մտածում էր նրանցից
յուրաքանչյուրը, բայց հավասար սիրելուն դեմ չէին:
Ու այսպես ուրախ երգելով ու սիրով,
նրանք չորսն էլ միաժամանակ տուն էին հասնում: Թփթփիկին հավասար հանգստանում էին թզուկներն ու հետո բոլորով գործի անցնում` եփում, թափում, ուտում, խմում:
Մի անգամ այնպես պատահեց, որ թզուկները տանը մնացին` տանը գործ շատ կար անելու: Թփթփիկը մենակ գնաց անտառ օջախի համար վառելափայտ բերելու:
Նա նոր էր սկսել հավաքել ծառերի չորացած ճյուղերը, մեկ էլ դիմացը կանգնեց մի գորշ արջ:
-Ես քեզ պիտի՛ ուտեմ,- ասաց արջը Թփթփիկին: Դրա համար ինձ հետ իմ տուն պիտի՛ գաս,- զխկրտաց արջը:
Ինչ կարող էր անել Թփթփիկը: Նա շատ էր հեռու ընկերներից, թե օգնության կանչեր: Մեկ է, նրանք չէին լսի:
-Լավ, կգա՛մ,- ասաց Թփթփիկը արջին և նրա հետ առաջացավ անտառի խորքը: Բայց Թփթփիկը գիտեր, որ ընկերները կփնտրեն իրեն, երբ տեսնեն ուշանում է: Նա փորձեց խորամանկել արջին:
-Իմ կոշիկի՛ մեկը քեզ պետք չէ, չէ՞,- հարցրեց Թփթփիկը արջին,- ես այն դեն եմ նետում:
-Ինձ պե՛տք չէ, կարող ես շպրտել,- մռթմռթալով պատասխանեց արջը:
-Մյուսն էլ կարո՞ղ եմ դեն նետել,- ավելի համարձակ հարցրեց Թփթփիկը:
-Կարո՛ղ ես,- նրա վրա չնայելով մռռաց արջը:
-Գուլպաներս էլ կարո՞ղ եմ դեն նետել:
-Կարո՛ղ ես:
-Շապի՞կս էլ:
-Շապի՛կդ էլ:
Մինչև հասան արջի բնակատեղին, Թփթփիկը կիսամերկ էր մնացել:
-Ես քեզ պիտի սպանե՛մ հետո ուտեմ: Ի՞նչ կցանկանաս մեռնելուց առաջ,- դիմեց Թփթփիկին արջը:
Թփթփիկը նրան մեկնեց իր ցանցավոր գլխարկը, որ մոռացել էր մյուս հագուստների հետ թողնել ճանապարհին և դրանով մեկ ջուր ուզեց արջից:
-Լա՛վ,- գլխարկը վերցնելով փնթփնթաց արջը,- բայց ջուր որտեղի՞ց տամ քեզ:
-Անտառի լճակից բեր,- ասաց Թփթփիկը:
-Այդ դեպքում մտի՛ր այս պարկը, որ չփախչես,- չգիտես որտեղից մի պարկ բերեց արջը:
Թփթփիկը ստիպված համաձայնեց
ու մտավ արջի
տված պարկի մեջ: Արջը պինդ կապեց պարկի բերանն ու Թփթփիկի համար գնաց ցանցավոր գլխարկով ջուր բերելու: Է՜հ, գլխարկով ջուր բերել կլիներ, այն էլ` ցանցավոր: Արջը ջուրը վերցնում էր, որ տանի, իսկ ջուրը չէր մնում` թափվում էր ցանցավոր գլխարկի
անցքերից: Այսպես ժամեր շարունակ:
Թզուկները` Կարմրիկը, Կապույտիկն ու Կանաչիկը, տեսնելով Թփթփիկը ուշանում է, անհանգստացան:
-Մի բան պատահած չլինի՞,- ասաց Կարմրիկը:
-Պե՛տք է գնալ նրա հետևից,- ասաց Կապույտիկը:
-Այո՛, այո՛, պետք է շուտ գնա՛նք մեր ընկերոջ հետևից,- համաձայնեց Կանաչիկը:
Թզուկները մի մարդու նման դուրս եկան տնակից:
-Վա՜յ,- ձայնեց Կանաչիկը, գտնելով Թփթփիկի ձախ կոշիկը,- սա մեր Թփթփիկի՛ կոշիկն է:
Մի քիչ էլ խորացան անտառում, գտան Թփթփիկի աջ կոշիկը: Հետո էլի առաջացան ու գտան աջ գուլպան, հետո ձախ գուլպան: Անհանգստությունը պատեց թզուկներին էլ ավելի: Արդեն կասկած չունեին, որ Թփթփիկին դժբախտություն է պատահել: Նրանք արդեն հասել էին արջի բնակատեղը: Հանկարծ լսեցին իրենց Թփթփիկի ձայնը.
-Կարմրիկը, Կապույտիկը, Կանաչիկը տեսնես որտե՞ղ են, հասե՛ն օգնության,- ինքն իրեն խոսում էր Թփթփիկն ու
տխուր երգում`
Կարմրի՜կ, Կապույտի՜կ, Կանաչի՜կ,
Հարազատ ու բարի ընկերներ,
Ուզո՜ւմ եմ, որ հասնեք իմ կանչին,
Ծուռթաթ արջն ինձ քանի չի կերել:
Կապույտի՜կ, Կանաչի՜կ, Կարմրի՜կ,
Եղբայրնե՜ր, օգնության շո՛ւտ հասեք,
Ձա՛յն հանեք, դուք մեծե՜ր իմ փոքրի՛կ,
Փորձանքից ձեր եղբո՛րն ազատե՛ք:
-Մենք այստե՜ղ ենք,- համարյա միաբերան ասացին երեք թզուկները: Նրանք արագ - արագ քանդեցին պարկի բերանը բանտող պարանը: Թփթփիկը դուրս եկավ պարկից: Թզուկների ձեռքից վերցնելով հագավ իր թե՛ կոշիկները, թե՛ գուլպաները: Վարտիքը, վերնաշապիկը` բոլոր հագուսները հավաքել - բերել էին թզուկները: Հիմա նրանց պետք էր փախչել: Ընկերներով որոշեցին լճափի ավազով լցնել պարկը, բայց արջի աչքից հեռու ափից: Հետո ամուր կապեցին ավազով լի պարկի բերանը` թողնելով արջի որջում, և ուրախ -ուրախ ճամփա ընկան դեպի տուն:
Արջը մինչև մութն ընկնելը փորձում էր ցանցավոր գլխարկով ջուրը տեղ հասցնել: Նա այնքան էր հետ ու առաջ արել, որ հոգնել էր: Թփթփիկի վրա կատաղած, արջն այլևս որոշեց տուն գնալ և Թփթփիկին առանց ջուր տալու
սպանել: Պարկի վրա արջը այնպես հարձակվեց, որ բերանն ու աչքերը ավազով լցվեցին` քիչ էր մնում խեղդվեր: Նա արջավարի ձայնը գլուխը գցեց, ոչինչ չհասկանալով կատարվածից: Արջը և՛ հոգնա՛ծ էր, և՛ սովա՛ծ էր, դեռ աչքերի մղկտոցն էլ մի կողմից: Նրա մռնչոցից անտառը ցնցվեց, բայց Թփթփիկի ու թզուկների պետքն էլ չէր:
Արջն այդ օրվանից Թփթփիկի անունը լսել անգամ չէր ուզում: Թփթփիկի անունը լսելիս, փախչում էր անտառի ամենախորքը: Իսկ ընկերները` Թփթփիկը
և թզուկներ Կարմրիկը,Կապույտիկն ու Կանաչիկը, մինչև հիմա էլ ապրում են
հեքիաթային լճակի մոտ գտնվող անտառի տնակում` մեծ ու փոքր եղբայրների նման:
Комментариев нет:
Отправить комментарий