ՎԻՆ
Ծնողներն իրար էին գլորում իրեն, երբ դեռ ձվի մեջ էր: Նրանք հերթով տաքացնում էին ձուն, որ ինքը ձվի ներսում չմրսեր: Նրանց փորի վրայի բնում, որ ընդամենը ծալքերով ճարպաշերտ էր, շա՜տ ապահով էր:
Լսում էր, թե ինչպես են իր համար անուն փնտրում:
-Վի՛ն, Վի՛ն կանվանենք մեր պինգվինիկին, երբ նա դուրս գա ձվից,- առաջարկում էր մայրը:
Հայրը ուրիշ անուն չգտնելով, համաձայնում էր: Հետո, հաջորդ օրը ամեն ինչ նորից էր սկսվում:
-Վի՛ն կանվանենք մեր ձագուկին ,- գտած ասում էր մայրը:
Ու նորից, առանց հակառակվելու,
գլխի շարժումով հավանություն էր տալիս հայր պինգվինը: Լսում էր, բայց ծնողներին արձագանքել չէր կարողանում, քանի որ դեռ ձվի մեջ էր: Երբ վերջապես ճեղքեց ձվի կեղևն ու լույս աշխարհ եկավ, արդեն անուն ուներ:
-Վի՜ն,- գորովալից ձայնում էր մայրը:
-Վի՜ն,- սիրալիր էր հայրը:
Վին պինգվինիկը շատ ուրախացավ, երբ աշխարհ մտավ ու տեսավ, որ մենակ չէ: Նա բացի ծնողներից, տեսավ պինգվինիկների ու պինգվինների մի ամբողջ մոլորակ: Նրանք բոլորն էլ իր նման բաց գույնի աղվամազով պատված մարմին ունեին, իսկ աչքերի շուրջը` սև շրջանակներ, կարծես ակնոցներ, իր աչքերի շրջանակների
նման: Հայր ու մայր պինգվիններն էլ նման էին նրանց հայրերին ու մայրերին` մեջքներին ասես մուգ գույնի թիկնոց կրեին, գլուխները ածխոտ էին, իսկ կրծքավանդակից մինչև փորի տակը ձնագույն էր:
-Իսկական պինգվինների համար է այս սառուցյալ աշխարհը,- մտածեց Վինը: Հա, էլի, աչքը ինչքան կտրեր` սառո՛ւյց էր ու ձյո՛ւն, ու մեկ էլ` պինգվիննե՜ր – պինգվինննե՜ր: Ինչքան էլ մայրիկն ու հայրիկը նրան ստիպեին կրկնել Անտարկտիդա անվանումը, մե՛կ է, նրա համար այս վայրի անունը պինգվինների՛ մոլորակ էր մնում:
Վաղուց քաղցած էր, ուտել շատ էր ուզում: Մայրիկն ու հայրիկն էլ էին քաղցած լինում: Մայրիկն ու հայրիկը հերթով էին գնում որսի ու վերադառնում` կտնառքում բերած ձկով կերակրում իրեն: Մի անգամ հայրիկը գնաց որսի ու չվերադարձավ: Ասում են՝ շնաձկները նրանց ջրային թշնամիներն են: Էս համատարած սառույցների վրա էլ ճայերն ու սկուաներն էին խանգարում ապրել: Երբ ձվերը թողնելով, մայրիկներն էլ էին
գնում սնվելու, ճայերը կտցելով ջարդում էին: Իսկ սկուաները հարձակվում էին միայնակ
ու անզոր պինգվինիկների վրա: Լավ էր, որ թշնամիները
թվով պինգվիններից շատ չէին` իրենց նման հազարների չէին հասնում:
Աչքը ջուր կտրեց, մոր վերադարձին սպասելով: Այս անգամ նա ուշանում էր: Վերադարձած մամաների մեջ Վինը իր մորը չգտավ: Ուզում էր տխրել.
-Չլինի թե՞ հայր պինգվինի նման, շնաձկան բաժին է դարձել,- դեռ չէր հասցրել մտածել բոլորի մեջ այդքան մենակ մնացած Վինը, մեկ էլ տեսավ ուրիշ մամաներ, որոնք կորցրել էին իրենց ձագուկներին, նկատել են իրեն: Նրանք խոշոր ու ծանր քայլերով գալիս էին դեպի Վինը:
-Վա՜յ, վա՜յ, վա՜յ,- վախեցավ Վինը,- սրա՛նք ինձ ոտնատակ կտան` իրենք էլ չհասկանալով ինչ են անում: Վինը սկսեց լեղապատառ փախչել: Նա փորձեց մտնել հանգիստ կանգնած մամաներից մեկի փորի տակ: Բայց այնտեղից գլուխը դուրս հանեց ուրիշ պինգվինիկ.
-Զբաղվա՛ծ է,- հասկացավ Վինը: Ու մեկ էլ զգաց, որ մեկն իրեն կոպտորեն ձգեց: Մի քանի ակնթարթ աչքերի դեմ աշխարհը մթնեց, հետո մարմնին հաճելի ջերմություն զգաց: Զգուշորեն գլուխը դուրս հանեց իրեն
գտած տաք տեղից:
-Ահա՛, այն վազող մամաները,- նկատեց Վինը,- ձեռնունայն ու գլխիկոր հե՛տ էին գնում: Նրանք անվերադարձ կորցրել էին իրենց ձագերին և շատ էին ուզում մայրիկ մնալ:
Վինը հասկացավ, որ ինքը պաշտպանված է: Նրան իր փորի
տակ էր թաքցրել պինգվիններից մեկը, ով սկսեց կերակրել իրեն: Այս նոր մայրիկը կարծես իր մայրիկը լիներ`շատ հոգատար էր Վինի նկատմամբ: Իսկ գուցե՞ նա հենց իր մայրիկն էր` իր անունն էլ գիտեր:
Վինը ինքնամոռաց ուրախ էր: Նրա
ականջով ընկավ ծանոթ երգը, որ իր երգն էր վաղուց`
Գնո՛ւմ եմ օրոր ու շորոր,
Մտքի՛ս մեջ օվկիան ու ծովեր,
Իմ ճամփան` մեկ ուղիղ, մեկ` կոր,
Սառույցով բլրացած ձորեր:
Ընկնո՛ւմ եմ, գլորվում, ելնում,
Կորչում եմ` հեռո՜ւ բոլորից,
Զգո՛ւյշ եմ, մենակ եմ երբ մնում,
Գնում եմ ի՛մ ճամփան նորից:
Պինգվի՛ն եմ փոքրիկ, բայց ուժեղ,
Վա՛խ չունեմ ճամփին կորչելուց,
Տեղս եղել է երբ շատ նեղ,
Օտվել եմ թշնամուս թշնամուց:
Գնո՛ւմ եմ, խառնվե՜մ օվկիանին,
Սառցե այս ճամփան վերջանա,
Երգս պահ կտամ ջրերին,
Անունս երգիս մեջ կմնա:
ՀԱՍՄԻԿ ԱՋԱՄՅԱՆ