ՁՆԵՄԱՐԴ
Կարծես փետրաթափ թռչուն լիներ երկինքը, օդն ասես լիքն էր պարող փետուրներով: Այնպես սրտաբաց էր օրը` խոշոր ու ճերմակ փաթիլները` ընկնելու չափ, իջնում էին վերևից և նստում ամեն տեղ:
Աշոտիկը պատուհանից դուրս պարզեց ձեռքը: Մի քանի փաթիլ նստեցին ափի մեջ և անմիջապես հալվեցին: Նրա ձեռքը թրջվեց սառը հպումից:
-Թող գետնին նստեն,- որոշեց ու հետ քաշեց ձեռքը:
Փակ պատուհանից այնքա՜ն տաք էր ձյունառատ աշխարհը, այնքա՜ն շատ էին փաթիլները, որ օդը չէր երևում:
Մի ամբողջ օր երկինքն անխոս ձյունեց: Բակում ամեն ինչ ծածկվեց ձյունի տակ` ձյունը ճոճանակ էր նստել, թամբել էր բակի կարուսելի ձիուկին, ուրախ գնացքի շչակի հետքն էլ չէր երևում: Այսպիսի լռություն նույնիսկ իր դասաժամին չէր լինում` ինչքա՛ն էլ ուսուցիչը պարտադրեր: Աշոտիկը շատ էր ուզում բակ գնալ, վազվզել ձյուներում, նստել փաթիլների նման, գլորվել ձյունառատ գետնին: Երբ այդ մասին ասաց ծնողներին,
Աշոտիկի խնդրանքը ծնողները չմերժեցին: Նա տաք հագնվեց ու դուրս եկավ տնից:
Ոտքերի տակի ձյունը ուրախ ճռճռոցով բարևեց, երբ Աշոտիկը սկսեց քայլել ձյան վրայով:
-Ի՜նչ փափուկ է, ի՜նչ լավն է,- մտածեց Աշոտիկը: Ձյունը շարունակեց ոտքերի տակ ճռճռալ :
-Ուրախ է, լավն է, փափուկ է ձյունը,- կանչեց Աշոտիկն ու թավալվեց ձյուներին: Ուրիշ երեխաներ տեսնելով Աշոտիկի ուրախությունը, նույնպես բակ իջան: Այլևս խախտվեց օրվա խլությունը: Այնպիսի խնդություն էր բակում, անասելի ազատություն կար ձյուներում:
-Եկե՛ք հավաքենք ձյունն ու ձնեմարդ պատրաստենք,- ասաց Աշոտիկն ու գործի անցավ:
-Այո՜, այո՜, ձնեմա՜րդ,- միացան մյուս երեխաները:
Քիչ հետո երեխաները ձյունե գնդերը գլորելով դրեցին իրար վրա:
Քթի համար գազար էր պետք` գիտեին, բերանի համար կարմիր կոճակ էր` կճարվեր, թևերի համար` ճյուղեր, դե, գլխարկի տեղ` դույլ: Ամեն ինչ տեղն էր, ամեն ինչ ճիշտ արեցին: Աշոտիկն իր <շարֆը> փաթաթեց ձնեմարդու վզով`այդպես ավելի ճիշտ էր և իրական, չէր մրսի իրենց ձնեմարդը :
-Ձնեմարդ, ձնեմարդ,
Քեզ հետ խաղանք մենք ուրախ,
Մթին երբ որ տուն գնանք,
Չվախենաս դու մենակ,- իր համար սկսեց երգել Աշոտիկը: Ուրախ ու խաղից քրտնած երեխաները, մեկ - մեկ տուն գնացին: Բակը քիչ - քիչ դատարկվում էր և օրը վերջացել էր արդեն, բայց ոչ մի մութ էլ չկար` ձյունն այնպես լուսավո՜ր էր:
-Բակում մենակ մնալուց չվախենաս, վաղը նորից կխաղանք,- ասաց Աշոտիկը ձնեմարդուն ու ինքն էլ տուն գնաց: Անկողին մտնելուց առաջ մի անգամ էլ պատուհանից դուրս նայեց` ձնեմարդը իր տեղում էր, տեսավ ու գնաց քնելու:
Հաջորդ օրը երեխաները նորից հավաքվեցին ձնեմարդու շուրջը: Բակը լցվեց ուրախ կանչերով` Ձնեմարդ, ձնեմարդ,
Քեզ հետ խաղանք մենք ուրախ,
Մթին երբ որ տուն գնանք,
Մնա մեծի պես անվախ:
Նրանց ձա՜յնը տարածվեց, տարածվեց ու ճեղքեց ամպոտ երկինքը: Արևը, որ ծածկված էր բամբականման ամպերով, զարմացած ցած նայեց: Աշխարհն առանց իրեն չէր կարող ուրախ լինել: Եվ արևը աչքով արեց ամպի տակից:
-Օ՜հ, ինչ հետաքրքիր է, ինչքան երեխանե՜ր կան բակում, նրանք ձյան մեջ գլորվելուց չեն վախենում: Նայեց արևն ամպի ճեղքից և բակում ճչանաչեց մարդու նման օտարին, ում այնքան սիրում էին երեխաները: Արևն ինքն էլ երեխայի պես սիրում էր աշխարհը և կամեցավ խաղալ բակում նրանց հետ:
-Հեռու գնացե՛ք, ամպեր,- հրամայեց արևը և սկսեց ցրել նրանց իր ճանապարհից:
Կամաց - կամաց երկինքն սկսեց պարզել: Արևն իր շողերով ցած իջավ, ձյունն սկսեց ադամանդի պես աչք ծակել:
-Դու ո՞վ ես,- ջերմ հպվելով ձնեմարդուն, հարցրեց արևի շողը :
-Ես, ես,- կմկմաց ձնեմարդն ու բերանի կարմիր կոճակն ընկավ գետնին:
-Ձե՛ռքդ տուր, բռնվոցի խաղանք,- ժպտաց արևի շողը: Բայց ձնեմարդը չհասցրեց իրեն պահել ձեռքի ճյուղը և ցած գցեց: Արևը շատ էր ուզում նրա հետ խաղալ և իր շողերով պտտվում էր ձնեմարդու շուրջը, գրկում էր, համբուրում: Երեխաները ձնեմարդուն թողել էին աչքից հեռու և ձնագնդի էին խաղում, սահնակ քշում: Իսկ ձնեմարդը գնալով կուչ էր գալիս արևի քնքշանքից ու փոքրանում: Հաջորդ օրը ավելի արևոտ էր և ուրախ` ճոճանակի ձյունը հալվել էր ու չկար, կարելի էր ճոճանակ խաղալ, գնացքը ուրախ ճչում էր երեխաների ձեռքերի հպումից, կարուսելի ձիուկը ձյուներում չէր կորել և կարելի էր հեծնել: Բակը արևոտվել էր ու փոխվել: Աշոտիկը հիշեց ձնեմարդուն, բայց նա չէր երևում: Նա գնաց տեսնի ուր է ձնեմարդը: Բայց այն տեղը, որտեղ ձնեմարդն էր եղել կանգնած` վզին փաթաթած իր <շարֆ>-ով, այլևս չկար: Գետնին հավաքված ջրի մեջ, ընկած էր իր <շարֆը>: Այնտեղ կարմիր կոճակ, գազար, ծառի չոր ճյուղեր ու դույլ էլ կար ընկած….
Արևը ծիծաղեց Աշոտիկի երեսին:
Օրն ուրախ էր և արևոտ, երեխաները տարվել էին իրենց նոր խաղերով:
Աշոտիկը վազեց ընկերների հետ խաղալու…