ԲՈԼՈՐԻ ՄԵՋ ԻՆՁ ԵՄ ՓՆՏՐՈՒՄ
Մեզանից շա՜տ ու շա՜տ առաջ, կար Կանա անունով մի կրիա: Նա ապրում էր ինքն իր համար: Կանան մեջքին ամենևին էլ զրահատիպ պատյան չուներ և բոլորովին էլ նման չէր մեր օրերում ապրող ցամաքային և ջրային կրիաներին, որոնք պատյանի ծանրության տակ խոնարհվել են գետնին: Մի օր Կանան որոշեց բոլորի մեջ փնտրել իրեն: Նրան թվում էր, որ բոլորն այնպիսին են, ինչպիսին ինքն է, որ բոլոր- բոլորը պետք է ուտեն այն, ինչ ինքն է ուտում` կանաչ խոտ արածեն, ջրային բույսեր ու փոքրիկ խեցգետիններ ուտեն: Կանան գրեթե համոզված էր, որ երբ ինքը քնած է, բոլորն են քնած: Կանան կարծում էր, որ բոլորին սիրելու համար, նման լինելը շատ կարևոր է:
- Ագռավին կարելի է սիրել, ինձ նման երկարակյաց է, մինչև հարյուր տարի կապրենք միասին: Ձագերն էլ իմ ձագերի նման ձվերից են դուրս գալիս,- գոհացած որոշեց Կանան: Բայց խեղճ Կանա կրիայի հիասթափությունը շատ մեծ եղավ, երբ իմացավ, որ ագռավը գող է: Կանան ատելով ատում էր գողությունը: Էն էլ այն դեպքում, երբ քեզանից են գողանում` Ագռավը թռցրել էր ավազներում դրած Կանայի անհաշիվ ձվերից: Դեռ ծառի վրա թառած էլ կռռում էր սիրո, եղբայրության, բարեկամության մասին:
- Չէ՛, ագռավին չե՛մ կարող սիրել, ինձ նմա՛ն չէ, -որոշեց Կանա կրիան:
- Օձը կարծես ինձ նման է, օձին կսիրեմ: Վիզն իմ վզի նման երկար է, ապրում է ամուր գետնի վրա: Ինձ նման լողալ գիտի ջրում: Մաշկն էլ իմ մաշկի նման թեփուկներով է ծածկված:
Բայց Կանան դեռ չէր հասցրել օձին սիրել,
նրանից էլ հիասթափվեց.
- Մի՞ թե կարելի է այդչափ թունավոր լինել, գող լինել ու մնալ սառնարյուն սողուն: Չէ՛, չեմ կարող օձին սիրել,- հասկացավ Կանան:
- Արջը կարծես ինձ նման է: Ես էլ եմ քնել շատ սիրում, արջին կսիրեմ,- որոշեց Կանան:
Բայց արջից էլ հիասթափվեց, երբ տեսավ որ վայրենի, արնախումի մեկն է: Իր աչքի առաջ արու արջը սատկացրեց իր ցեղակից մի ուրիշ արջի անօգնական ձագերին:
Սրա - նրա մեջ իրեն փնտրելուց չէր դադարում հոգնել Կանան: Ա՜խր նա շատ էր ուզում, որ բոլորն իրեն նման լինեն: Բայց ամեն մի հիասթափությունից հետո, նրա մեջքը պատվում էր կոշտ, զրահատիպ պատյանով: Եվ օր - օրի պատյանը կարծրանում էր ու մեծանում: Կանա անունով կրիան, այլևս չէր շտապում փնտրտուքի մեջ և դարձել էր շատ դանդաղաշարժ:
Երբեմն - երբեմն գլուխը դուրս էր հանում պատյանի տակից, տեսնելու հույսով իր նմաններին.
-Այսպես ապահով եմ զգում ինձ, թո՛ղ ոչ մեկին էլ նման չինեմ ու անսեր ապրեմ,- միանգամից որոշեց Կանան, փնտրելուց հոգնած:
Նա շա՜տ, շա՛տ էր հիասթափված ամենքից ու ամենից, դրա համար էլ այլևս չէր սպասում տեսնել ծովափնյա ավազներում իր դրած անհաշիվ ձվերից դուրս եկող փոքրիկ կրիաներին: Նա թողնելով անպաշտպան ձվերը, լողում էր ծովի հեռո՜ւ խորքերը: Երբ իր փոքրիկները ձվերից լույս աշխարհ էին գալիս, Կանան նրանց չէր ուզում տեսնել: Նրանք էլ Կանային նման չէին, քանի որ Կանա կրիան մե՛ծ էր…
Комментариев нет:
Отправить комментарий